ယနေ့မျက်မှောက်ခေတ်ကာလ မြတ်စွာဘုရားရှင်၏ သာသနာ့နွယ်ဝင်များ ဖြစ်ကြသော သီလရှင်များသည် အမျိုးဂုဏ်၊ အဆင်းဂုဏ်၊ ပစ္စည်းဂုဏ်အားဖြင့် အထက်တန်းကျသော အမျိုးသမီးအများအပြား ပါဝင်ကြသကဲ့သို့ ထိုဂုဏ်အားဖြင့် အဆင့်အတန်း မမြင့်သော်လည်း အကျင့်စာရိတ္တကောင်းမွန်သော အမျိုးသမီးများစွာ ပါဝင်ကြပေသည်။ မြတ်စွာဘုရားရှင်၏ သာသနာ့နွယ်ဝင်များဖြစ်ကြသော သီလရှင်များသည် မြတ်စွာဘုရားရှင်၏ တရားတော်များကို လေ့လာသင်ယူ၍ သာသာနာတော်၏ အဓွန့်ရှည်စွာ တည်တံ့နိုင်ရန် လူဝတ်ကြောင်ဖြစ်သော ဥပါသကာ၊ ဥပါသိကာမများအား  တရားဓမ္မများ ဟောပြောပြသပေးခြင်း၊ ဆန့်ကျင့်ဘက်အယူဝါဒများအား အေးအေးချိုသာစွာ ပယ်ရှားခြင်း၊ ပရိယတ်၊ ပဋိပတ်အားကိုယ်တိုင် ကြိုးစားအားထုတ်ခြင်း၊ ပရဟိတလုပ်ငန်းများဆောင်ရွက်ခြင်း၊  သတ္တ၀ါများ၏ အကျိုးစီးပွားကို ဆောင်ရွက်ခြင်းများကြောင့် မြတ်စွာဘုရားရှင်၏ သာသာနာတော်တွင် အမျိုးသမီးတို့နယ်မှ ခံ့ထည် ၀င့်ကြွားနိုင်ခဲ့ပေသည်။

လယ်တွေ မြေတွေကို ပိုင်ဆိုင်သော သူကို လယ်ပိုင်ရှင် မြေပိုင်ရှင်လို့ ခေါ်ကြတယ်။ ဥစ္စာဓနတွေပိုင်ဆိုင်သူတွေကို ဓနရှင်၊ ခြံပိုင်ဆိုင်သူကို ခြံရှင်၊ အိမ်ပိုင်သူကိုတော့ အိမ်ရှင်စသဖြင့် ခေါ်ဆိုကြပါတယ်။ ထို့အတူ ဘိက္ခုနီသာသနာကွယ်ပြီး နောက်ပိုင်း အမျိုးသမီးများအနေဖြင့် သာသနာကို တတ်အားသရွေ့ အကျိုးပြုနိုင်စေရန် ဥပါသိကာထက်အဆင့်မြင့်သော သီလတရားတို့ကို စောင့်ထိန်းလာကျရာကနေ သီလရှင်ဟု ခေါ်တွင်လေသလားဟု တွေးမိပါတယ်။ သီလတွေ အမြဲရှင်သန် နေလို့လည်း သီလရှင်၊ သီလတရားတွေ ရင်တွင်းမှာ ကိန်းအောင်းအောင် ကြိုးစားကြလို့ သီလရင်၊ သီလတရားတွေနဲ့ ယှဉ်တွဲနေထိုင်ကြလို့ သီလယှဉ်လို့လည်း အသံထွက်ခေါ်ဆိုကြတာ မှတ်သားရပါတယ်။

ဖန်ရည်စွန်းအ၀တ်ကို မြတ်နိုးကြတဲ့ ထေရ၀ါဒနိုင်ငံက ဗုဒ္ဓ၀ါဒီအမျိုးသမီးတွေဟာ သံဃာတော်တွေကို အားကျပြီး အတုယူ ကျင့်သုံးရာကနေ သီလရှင်သာသနာ ထွန်းကာလာတာ ဖြစ်ဖွယ်ရှိပါတယ်။ မြတ်ဗုဒ္ဓလက်ထက်တော်က သီလရှင်ဆိုတာ မရှိပေမယ့် ဘိက္ခုနီဆိုတဲ့ ရဟန်းအမျိုးသမီးများ ရှိကြတယ်ဆိုတာ မှတ်သားခဲ့ဖူးပါတယ်။ သီလရှင်ဟာ ရှစ်ပါးသီလပဲ စောင့်ပေမယ့် ဒီထက်အများကြီး ပိုပြီးနက်ရှိုင်းပါတယ်။ သီလရှင်သမိုင်းကို သိသာထင်ရှားစေတာဟာ ကုန်းဘောင်ခေတ် မင်းတုန်းမင်း တရားကြီးလက်ထက် ဗန်းမော် ဆရာတော်ဘုရားကြီးတို့နှင့်အပြိုင် သီလရှင်မယ်ကင်းလက်ထက်က ထင်ရှားပေါ်လွင် လာတယ်လို့ ဆိုကြပါတယ်။ လက်ရှိ မျက်မှောက်ခေတ်မှာတော့ နိကယ်ငါးရပ်ဆောင်သီလရှင်များ၊ ဓမ္မာစရိယ အောင်မြင် ပြီးသီလရှင်များ၊ ဓမ္မာစရိယမှာပင် တစ်နိုင်ငံလုံး ပထမရရှိ၍ အဂ္ဂမဟာကျော်သီလရှင်များ၊ ပရဟိတလုပ်ငန်းများကို ဦးဆောင်ကြိုးစားသောသီလရှင်များ စသည်ဖြင့် သာသနာ့တာဝန်ကို စွမ်းစွမ်းတမံ ဆောင်ရွက်နေကြတာဟာ သံဃာ တော်အရှင်သူမြတ်များနှင့်အတူ သီလ ရှင်ဆရာလေးများပါ သာသနာ့နွယ်ဝင်အဖြစ် သာသနာကို စောင့်ရှောက်နေ ကြပြီ ဖြစ်ပါတယ်။